大食嘢時代

B仔涼粉聽得多，不過從未有機會品嚐過，終於，今日老公專程同我入元朗，食足全程﹗

據朋友小瑩報料，元朗必吃美食有：勝利牛丸、B仔涼粉、「好到底」，仲有間好似叫「中田」日本料理的壽司，「大榮華」……但由於我哋人生路不熟，一落車，只好展開地毯式搜查，逐街逐巷去搵……結果，第一個成功搵到的check point就係……勝利牛丸﹗

果然有料到，d牛丸好彈口，d牛腩仲多過d米粉，YEAH!

食飽牛丸牛腩，過一條大馬路，我哋發現第二個check point喇﹗就係「好到底」﹗

坐在店內，恍似回到六七十年代，店內裝修保留著舊日的情懷，真固別有一番風味﹗為要試試這店馳名的麵，一向愛吃河粉的我，也轉轉口味，點了碗雲吞麵，而老公就要了碟水餃炸醬撈麵。

離開「好到底」，見前面店舖堆滿了人，睇睇，原來有間「大同」餅家。孤陋寡聞的我，一向只知元朗有「恆香」、「榮華」，但原來仲有呢間都有d來頭的「大同」餅家……專程為搵食而嚟到元朗，又點可以錯過呢﹗就買一包「皮鬆脆、肉鬆軟」的鷄仔餅，同一磚簡簡單單用紙包著的雲片糕吧﹗

繼續地毯式搜查，但完全唔見壽司店、「大榮華」同「B仔涼粉」的蹤影，只好問人。聰明的老公，憑著途人幾句的提示……"登﹗登﹗登﹗登﹗"終於……我有生之年，終於有機會嚟到「B仔涼粉」喇﹗（好似誇張咗d :P）

「B仔涼粉」實在太大碗喇﹗根本冇可能食得晒，諗諗，還是點了碗什果涼粉，同一盒士多啤梨糯米卷……嘩﹗一見到個賣相，完本已經飽了八九成都一於少理，食咗先算﹗結果，「完成」了整碗的什果涼粉，但士多啤梨糯米卷就剩下三件打包返屋企。

講到呢度，你或者會發現，點解由「好到底」開始就冇相睇呢？﹗皆因我哋兩個一見到美食當前，即刻興奮到乜都唔記得，淨係掛住食，次次都係食到尾先記得﹗

不過，我哋真係好有誠意同大家分享 ga，所以，一返到屋企，都即刻影番d「戰利品」俾你哋睇呢﹗